『義人的腳步被耶和華立定；他的道路，耶和華也喜愛。他雖失腳也不致全身仆倒，因為耶和華用手攙扶他。』(詩篇三七23-24)
幾個禮拜前有一朝天未光，剛剛醒咗瞓響床上面，忽然心裡面出現一句說話「你會仆倒！」。我當時唔係好明點解，因為我一向行路好專心，好穩陣，對眼又不斷噉觀察周圍嘅環境，預防有突發嘅情況出現，印象中好似從來無仆低過細個嗰陣學人打柔道，係就係有成日躂落地，不過因為有曬心理準備，所以唔知道突然跌倒嘅感覺會係點。
去到8月13日，係教會兒童部嘅假期聖經樂園戶外日，響鑽石山真鐸學校玩遊戲活動，我去做義工幫手。學校嘅大禮堂裡面，同講台打對面嘅嗰邊，係一排一排斜上嘅座位，每一級都有尺幾高；當啲家長同小朋友一排一排坐好之後，我就逐個派人名貼紙畀佢哋貼響襟前，點知落到最低嗰級嘅時候，派得兩派就叉錯腳，電光火石之間就由近兩尺高嘅嗰級，嘭一聲跌咗落地，佢哋個個拿拿聲走埋睇下我點，怕我呢副成百六磅重嘅老骨頭可能已經散散哋，所以唔敢郁我，我定一定神企返起身，覺得無乜點，於是對佢哋話［唔使驚，無事！無事！］，為咗小心起見，我走去廁所度檢查下自己啦，點知搵嚟搵去，㩒嚟㩒去都唔覺有邊忽地方有唔妥有痛，但係諗極都諗唔返起邊個位落地先，後嚟佢哋話係左邊身手㬹先撞落地，無理由吖，嘭一聲噉，點解痛都唔痛，周身點郁都無問題呢？呀！知道喇！原來係神出手托住墊住，所以無事。
神就係噉，耐唔耐會搵啲嘢提醒下你，要你記得佢一直響你身邊照顧住你；唔係久唔久派舊錢畀你，而係要你安然度過一啲你控制唔到嘅意外情況。